Ќе ја одбијам претседателската плата. Тоа за мене не е голема работа, изјави Трамп
Новоизбраниот американски претседател, Доналд Трамп, ја одби претседателската плата од 400.000 долари годишно, пренесе денеска Н1.
На собирот на 17 септември во Њу Хемпшир, Трамп кажа дека во случај да биде избран, ќе ја одбие претседателската плата.
– Првата работа која ќе ја направам кога ќе станам претседател? Ќе ја одбијам платата на претседател. Тоа за мене не е голема работа – рече тогаш Трамп.
Кога на Твитер му го упатија истото прашање Трамп го потврди својот став за тоа.
„Што се однесува до платата нема да земам ниту еден единствен долар. Се откажувам од својата плата ако станам претседател“, напиша Трамп на Твитер.
Тој напомена дека ќе земе одредени ситници на кои претседателот има право според американскиот закон.
Претседателот на САД има право на вкупна плата од 400.000 долари годишно.
Освен тоа, има право и на покривање на дополнителните трошоци во износ од 50.000 долари.
Инаку, Трамп ќе биде само третиот претседател на САД кој ја одбил претседателската плата, по Херберт Хувер (избран во 1929) и Џон Ф. Кенеди (1961) кои своите плати ги донирале во хуманитарни цели.