На 2 април, во организација на планинарското друштво „Козјак“ од Прилеп ќе се одржи 4-тиот по ред традиционален планинарски марш посветен на основоположникот на планинарството во Македонија, Даре Џамбаз. Патеката на овој марш е долга 16 км. и таа ќе започне од н.м. Дупјачани, потоа планинарите се искачуваат до манастирот Трескавец, а турата ќе заврши во амфитеатарот во населбата Варош.
„На оваа тура очекуваме да учествуваат од 500 до 600 планинари, со тоа овој марш спаѓа во еден од најмасовните во Македонија. Очекуваме да дојдат и наши колеги планинари од Бугарија. Тргнуваме од селото Дупјачани, од тука одиме кон месноста Сурун-Горно село, каде што има стари гробници од македонски тип кои датираат од 3 и 4 век п.н.е. Од тука се искачуваме на манастирот „Трескавец“ каде ќе има ручек, традиционално планинарско гравче, потоа слегуваме кон Маркови кули, манастирот Св. Архангел Михаил и маршот ќе заврши во амфитеатарот во населбата Варош“, истакна Методија Ризановски, претседател на планинарско друштво „Козјак“.
По овој повод планинарите одржаа и средба со градоначалникот на Прилеп, Марјан Ристески, кој истакна дека соработката на „Козјак“ со локалната самоуправа на Прилеп е одлична и дека Општината секоја година и финансиски го поддржува друштвото, кое е најстаро планинарско друштво во Прилеп, основано во далечната 1938 година. Друштвото моментално броело 100 членови.
„Големо задоволство ми е што ме посетија членовите на најстарото планинарско друштво од нашиот град. Добро е што друштвото покрај повозрасните членови има и подмладок. Планинарењето отсекогаш има голема традиција во нашиот град и ова е еден од поголемите спортско-рекреативни брендови на Прилеп. На голем број од активностите кои ги организира друштвото и јас лично сум присуствувал, а исто така и оваа година како локална самоуправа ќе го помогнеме друштвото со одредени финансиски средства. Соработката е на одлично ниво и таа ќе продолжи и понатаму. Моја препорака до најмладите е тие да се занимаваат со планинарење кое е еден од најубавите и најактивни спортови“, изјави Марјан Ристески, градоначалник на Прилеп.
Планинарското друштво „Козјак“ годинава по трет пат планира да го организира и кампот за едукација на млади планинари кој ќе се одржи во месец јули во месноста Беловодица. Годинава на овој камп било планирано да учествуваат 80 млади планинари.