Карпа со маса од 6 до 8 кубни метри и тежина од околу 20 тони се заканува да падне во езерото Треска од височина од околу 100 метри, алармира денеска директорот на Центарот за управување со кризи, Стојанче Ангелов.
Тој рече дека браната на езерото не би била загрозена, но постои опасност за луѓето кои пловат, потсетувајќи дека секојдневно има туристички тури и упати порака да се избегнува делот каде што е испустот на вода.
Директорот на ЦУК додаде дека карпата може таму да остане уште 100 години, но должност на центарот кој тој го води е да ги извести релевантните институции.
„Нема место за кревање паника, но ја известуваме компанијата со чамците местото да не го користат блиску до браната. Ризикот е многу мал, но сакаме да делуваме превентивно, да не се користи овој дел од ѕидот на браната“, истакна Ангелов.