Лидерот на ВМРО-ДПМНЕ, Христијан Мицкоски го најави почетокот на собраниската седница за избор на новата влада со моќна објава на Фејсбук, придружена со слика од последниот голем јавен митинг на партијата во Скопје.
„Денес започнува собраниската дебата која конечно ќе му стави крај на периодот на неработење, криминал, лоши вредности и разочарувања, со изборот на новата реформска влада,“ истакна Мицкоски, констатирајќи ја важноста на оваа седница за ставање крај на периодот на неактивност и корупција.
Осврнувајќи се на издржливиот дух на македонскиот народ, Мицкоски продолжи: „Македонија е нашиот дом, нашата заедничка тврдина. Нашите граѓани во минатото имаа различни предизвици, но секогаш беа лојални кон државата и правеа се’ за таа да биде слободна, независна и просперитетна.“
Мицкоски ја нагласи и потребата Македонија да возврати на посветеноста која ја имале граѓаните, велејќи: „сега е време Македонија да направи повеќе за секој граѓанин. Секој Македонец, Албанец, Турчин, Србин, Ром, Влав, Бошњак и сите останати кои вложија се за својата татковина”.
Објавата на идниот македонски премиер завршува со повик за акција: „За тебе! Почнуваме!“ повикувајќи ги граѓаните да се обединат и да работат заедно за иднината на Македонија.