По спроведената постапка за избор на кандидат за градоначалник на Општина Кривогаштани од страна на Извршниот одбор на СДСМ донесена е Одлука Игор Каравилоски да ја трча градоначалничката трка на престојните локални избори.
За Каравилоски од СДСМ велат дека е симбол на принципиелност, чесност, одговорност, достапност, отворен за соработка подеднакво за секој еден жител на нашата општина.
Каравиловски, кој има 25-годишно професионално искуство и беше началник во СВР Битола, истакна дека неговата визија е да ја направи Кривогаштани модерна и просперитетна општина.
Со голема чест Ве информирам дека сум избран за кандидат за градоначалник на нашата општина на претстојните локални избори, како претставник на Социјалдемократскиот сојуз на Македонија. Сакам да изразам голема благодарност до Претседателот Венко Филипче и Извршниот одбор на партијата за укажаната доверба.
Одлуката да ја прифатам оваа кандидатура произлегува од искрена желба да го продолжиме развојот на нашата општина со уште поголема енергија и да создадеме подобри услови за секој наш жител.
Мојата визија е јасна: Општина Кривогаштани да стане модерна, инфраструктурно уредена и просперитетна општина, со силна поддршка за земјоделците, нови можности за младите и поголема грижа за највозрасните.
Во изминатите 25 години професионално работно искуство сум докажал дека не ги делам граѓаните по ниту еден основ бидејќи верувам дека само обединети, без разлика на припадност или политичка определба, можеме да обезбедиме подобра иднина за нашите семејства, за нашите деца и за нашата општина.
Во периодот кој следува ќе бидам отворен за средби, идеи и предлози од граѓаните. Заедно да го направиме првиот чекор кон ново и поуспешно поглавје за Општина Кривогаштани!
Инаку, актуелен градоначалник на општина Кривогаштани е Николче Мискоски, исто така од СДСМ.
Од владечката ВМРО-ДПМНЕ, се’ уште го немаат објавено кандидатот за оваа пелагониска општина.