Прилеп денеска живее во страв и паника! Во само десетина дена граѓаните одново ги потресе дојава за поставена бомба во истиот локал, и тоа за време на најголемото случување во државата “Пивофест” – истакнаа на денешната прес конференција од ОК ВМРО-ДПМНЕ Прилеп.
Прес конференцијата во продолжение ја пренесуваме во целост:
“Додека во центарот на Прилеп имаше илјадници луѓе и како никогаш досега присутни полициски сили, повторно некој се обиде да ги загрози животите на граѓаните, а сеуште не е расветлен првиот настан.
Испарија уверувањата на градоначалникот Илија Јованоски и МВР дека градот и фестивалот се безбедни и дека состојбата е под контрола.
Ова е веќе црвен аларм и итно се потребни одговори од властите, особено од министерот за внатрешни Оливер Спасовски.
Господине министер одговорете и на јавноста како и на кој начин вашите припадници ги штитат граѓаните и што ли е потребно да се случи за вие да се одважите и да реагирате?
Дали е веќе јасно дека во Прилеп владее злосторничко здужение и истото се наоѓа во редовите на вашата партија?
Со месеци апелираме до вас дека градот е претворен во криминално дувло, дека се палат автомобили, се напаѓаат полицајци, се случуваат филмски грабежи среде бел ден, и што ли уште не, а вам сеуште мува не ве лази.
Прилеп е претворен во црна точка во државата која секој ја одминува, а одговорноста за тоа е целосно ваша и на градоначалникот Илија Јованоски.
Со оглед дека сето ова се случува во локалот на истакнат член на вашата партија, граѓаните мораат да знаат која е позадината на настанот и дали се работи за пренесување на некакви пораки и нерасчистени сметки?
Веќе апелиравме да се позанимавате и со првите луѓе кои треба да ја гарантираат безбедноста во Прилеп, каде најповикан е командирот на Полициската станица, Кире Спиркоски.
ВМРО-ДПМНЕ одново бара негово разрешување од функцијата и поставување на човек кој ќе работи исклучиво во интерес на зачувување на јавниот ред и мир.
Граѓаните не ги интересираат интригите и пресметките во вашиот двор, но бараат безбедно да се движат низ својот град.
Вашата незаинтересираност резултираше и со нарушување на угледот на фестивалот, настан кој е од витално значење за целата држава.
Бараме веднаш, во текот на денешниот ден да излезете со конкретни одговори и да преземете конкретни чекори, со цел посетителите во преостанатите два фестивалски дена да се чувствуваат безбедни во Прилеп”.
ВИДЕО: “Инфо Компас”