Од 1 јануари дел од здравствените услуги ќе поскапат, а граѓаните за услуга за која досега плаќаа 40 денари ќе треба да издвојуваат 60 денари, најави директорот на Фондот за здравствено осигурување (ФЗО), Сашо Клековски, на средба со медиумите.
Клековски информираше дека по повеќе од десет години одложување, Фондот донел одлука за зголемување на референтните цени за основниот специјалистички пакет и интернистичкиот пакет, како во јавните, така и во приватните здравствени установи. Така, специјалистичкиот преглед, кој според досегашниот ценовник изнесуваше 380 денари, сега е зголемен на 720 денари.
„Станува збор за симболично зголемување на партиципацијата за граѓаните – од десетина денари. Сакам да појаснам дека тоа не се нови средства што ќе ги добијат здравствените установи, туку се менува процентот на реализација. Установите фактурираат услуги кон Фондот, а најголем дел од нив не успеваат да го реализираат буџетот со завршена сметка, бидејќи услугите се преевтино вреднувани. Со зголемувањето на цените, овозможуваме реална валоризација на нивната работа“, изјави Клековски.
Според најавите, поскапуваат и други здравствени услуги. Специјалистички преглед со земање брис, кој досега чинеше 400 денари, ќе се наплаќа 750 денари. Општиот ургентен пакет се зголемува од 780 на 2.450 денари, додека ехо преглед на еден орган од 300 ќе чини 670 денари.
Од ФЗО велат дека целта на овие измени е подобрување на квалитетот на здравствените услуги и реално вреднување на работата на здравствените установи, без значително финансиско оптоварување за граѓаните.