Безбедносната состојба во Прилеп се движи кон точката на вриење. Вчеравечер во угостителски објект во нашиот град беше фрлена бомба која, за среќа, не експлодирала – истакна на денешната прес конференција, Петра Лукароска, претседателка на ОО СДСМ Прилеп.
Прес конференцијата во целост ја пренесуваме во продолжение:
-Точно 16 месеци одговорноста за безбедноста во државата е во рацете на ДПМНЕ и министерот Панче Тошковски. Во тој период во дневните полициски билтени беа регистрирани два инцидента со експлозивни направи, триесетина запалени автомобили, еден опожарен ноќен клуб и недефиниран број на оружени пресметки и насилства во угостителските објекти и градските улици.
Прилеп наликува на Дивиот Запад од неговите најславни времиња. Официјалните бројки на регистрирани инциденти само го потврдуваат фактот, дека власта на ДПМНЕ го направи Прилеп опасно и небезбедно место за живеење.
Граѓаните се оправдано загрижени за личната безбедност и безбедноста на своите најблиски. Како одговорна политичка партија, СДСМ уште еднаш алармира за сериозноста на проблемот кој и локалната и централната власт упорно го игнорираат.
Во таа насока е и нашиот апел до министерот Тошковски, но и до Советот на општина Прилеп: разрешувањето на началникот на ОВР Прилеп, Марјан Станоески и командирот на Полициската станица од општа надлежност, Горан Колонџоски, ќе биде првиот чекор во создавањето услови за нормализирање на безбедносната состојба.
Време е за одговорност!