На 4 април 2025 /петок/ од 19.00 часот во Ликовната галерија од ЦК „Марко Цепенков“ ќе биде отворена изложбата Let’s Talk About Plan(t)s, Baby! (Ајде да си зборуваме за растенија!) од прилепската умeтница Елена Димоска Николоска. Изложбата е поддржана од Министерството за култура и туризам во годишната програма за работа на Центарот во дејноста визуелни уметности.

Опис

„Let’s Talk About Plan(t)s, Baby!“ е уметнички проект кој ја истражува убавината и упорноста на природата, наспороти човечката летаргичност и занемарување. Овој проект се фокусира на двa специфични новоизградени објекти во Прилеп, основно училиште и градинка, кои покрај тоа што веќе неколку години се изградени, до сега воопшто не се користени за нивната наменета цел. Наместо со детскиот глас и насмевки, дворовите на овие објекти се исполнети со разновидни растенија. Додека и двата објекти полека се распаѓаат, а многу деца и родители  го очекуваат отворањето на овие објекти, природата величествено процветала во отсуството на човечко присуство. Проектот ја истакнува дијаметралната спротивност помеѓу човечкото занемарување и упорната способност на природата да ја пополни празнината. Покрај илустрирањето на човечкото занемарување, проектот покажува како природата наоѓа начин да даде цел на овие напуштени места, трансформирајќи ги во живописни градини и шуми.

Дополнително, „Let’s talk about plan(t)s, Baby!“ го потенцира и концептот на игнорирање на „слонот во просторијата“—во овој случај, новите, а веќе остарени, несудени образовни институции. Често, ние луѓето се фокусираме само на она што е директно пред нас, игнорирајќи и прескокнувајќи значајни проблеми кои лежат само малку подалеку од нашата непосредна перцепција.

Проектот ги поттикнува гледачите подлабоко да размислат, со тоа што повторно ќе се фокусираат на малите, „убави“ проблеми кои виреат околу она што треба да им биде во главен фокус, но, и да ѝ посветат внимание на природата, почитувајќи ја нејзината непокорлива способност да создаде нешто и таму каде што скоро и да нема ништо.

Елена Димоска Николоска:

Родена во 1994 г. во Прилеп, Република Северна Македонија. Дипломирала на Универзитетот „Св. Кирил и Методиј“ на Факултетот за ликовни уметности – Скопје во 2017 година, оддел – ликовна педагогија со сликарство. Во моментов е студент на магистерски студии на Факултет за ликовни уметности – оддел Скулптура, при Универзитетот „Св. Кирил и Методиј“ во Скопје. Во нејзината уметничка работа, главен фокус се социјални теми кои ги третира преку сликарството како главен ликовен израз, а од неодамна истражува со скулптурата, како и со новите ликовни медиуми. Моментално живее и работи во Прилеп како наставник по ликовно образование.

Изложби:

Организирани изложби:

2024: Годишна изложба Ателје Артика, Ателје Артика – Прилеп

2023: Годишна изложба Ателје Артика, Ателје Артика – Прилеп

2022: Годишна изложба Ателје Артика, Ателје Артика – Прилеп

2021: „Цртеж и вино“, Ателје Артика – Прилеп

Учество во ликовни проекти:

2017: Ликовно – истражувачки проект „Темно“  предводен од наставниците на катедрата за ликовна педагогија на Факултетот за ликовни уметности – Скопје

Ликовни колонии:

2020: Ликовна колонија „Уметничко лето ЦСЛУ 2020“ – ЦСЛУ, Прилеп

Групни изложби:

2024: „Избери ме“ – Кафе-Галерија Лувр – Прилеп

2024 „Современата уметност како инспирација за идните генерации“ – НУ Завод и Музеј – Прилеп

2024: „Алегорични фрагменти“ – Ликовна Галерија Марко Цепенков, Прилеп

2023: „Годишна изложба на ДЛУП“ – Фоаје Марко Цепенков, Прилеп

2024: „Под нулата“ – Ликовна Галерија Марко Цепенков, Прилеп

2023: „Креации од ноќта – уметност инспирирана од соништата“ –  Ликовна Галерија Марко Цепенков, Прилеп

2023: „Прва Трајна Поставка на Дела од Прилепски уметници“ – Градска Библиотека Борка Талески, Прилеп

2022: „Годишна изложба на ДЛУП“ Ликовна Галерија Марко Цепенков, Прилеп

2021: „Цртеж и вино” Ателје Артика, Прилеп

2021: „Годишна изложба на ДЛУП” Ликовна Галерија Марко Цепенков, Прилеп

2020: „Годишна изложба на ДЛУП“ Ликовна Галерија Марко Цепенков, Прилеп

2019: „Матијас беше тука“ Галерија ФЛУ, Скопје

2018: „Традицијата е код, традицијата е течение“ Ликовна Галерија Марко Цепенков, Прилеп

2018: „ДЛУП Совреме(н)“ НУЦК Марко Цепенков, Прилеп

2017: Ликовен проект „Темно“, галерија ФЛУ, Скопје

2017: Интернационален саем за уметност „Паратисима Скопје“ – МКЦ, Скопје

2015: Изложба на студентска графика  „Драгутин Аврамовски – Гуте“, галерија ФЛУ, Скопје