Денес во присуство на околу 1000 граѓани на Прилеп, Премиерот на Владата на Република Македонија, Никола Груевски, градоначалникот на Општина Прилеп Марјан Ристески, пратениците во Собранието Димитар Стевананџија и Ана Лашкоски, министерот на странски инвестиции Бил Павлески, беа отпочнати активностите околу изградбата на нова, втора фабрика во ТИРЗ Алинци Прилеп.
Новата фабрика на Акoмпласт е германска инвестиција за производство на автомобилски делови, фабрика која ќе значи нови 150 вработувања, и тоа исклучиво на високообразовани кадри од Прилеп и околијата. Капиталот на инвестицијата е 3 милиони евра.
Премиерот Груевски во своето обраќање потенцираше дека ова е петта фабрика, односно петти потпишан договор за инвестиција во последните 5 дена во Македонија.
При своето обраќање пак инвеститорите се заблагодарија на Владата на Р. Македонија, на градоначалникот Марјан Ристески, министерот Бил Павлески, како и на сите луѓе кои придонесоја за реализација на оваа инвестиција, за безрезервната поддршка и за одличните услови за инвестирање во државата.
Беа поставени и осветени темелите на фабриката, а градбата се очекува да биде завршена до крајот на летото.
Интересно беше и тоа што при турањето на темелите, инвеститорите пуштија и временска капсула со денешни весници, што претставувало обичај во Германија кога се гради нешто, ново, а целта е да остани белег во иднина, доколку по неколку генерации некој врши ископувања на ова место, да знае што тука имало во минатото.
Индустриската зона ТИРЗ Алинци е скоро во потполна спремност, изградена е високо квалитетна инфраструктура и веќе ги има првите 2 инвеститори. Овие нови странски инвестиции ќе значат брз подем на градот, кој покрај одличната инфраструктурна уреденост која ја има денес, конечно ќе заживува и на економски план.
