Гоце Бумбароски од општина Прилеп одржа прес конференција како реакција на ОО СДСМ Прилеп, од каде претходно во јавност излегоа со тврдење дека образовните институции и учениците во Прилеп, станале “жртви“ на лажни ветувања.
Прес конференцијата на Гоце Бумбароски во целост ја пренесуваме во продолжение:
Општина Прилеп, како локална самоуправа предводена од ВМРО-ДПМНЕ и градоначалникот Борче Јовчески, со должна одговорност ги отфрла сите изнесени невистини и манипулации искажани на прес конференцијата на ОО на СДСМ Прилеп. Наместо конструктивна критика, граѓаните се сведоци на уште една политичка флоскула од партија која во своето владеење остави траг од занемарен образовен систем.
Фактите се непобитни:
Во изминатите три години, Општината вложи над 100 милиони денари во унапредување на условите за работа и настава во сите основни и средни училишта во градот и населените места.
За прв пат, учениците од прво до трето одделение добиваат бесплатен, здрав оброк, со што ја покажавме нашата реална грижа за најмладите. Оваа мерка продолжува, а со новата учебна година ќе воведиме, нови олеснувања за родителите и семејствата.
Очигледно е дека во сите училишта се направени реконструкции на училници, обнова на наставна и информатичка опрема, поставување на смарт табли, уредување на спортски игралишта, партерно уредување и други проекти кои директно влијаат врз квалитетот на образованието.
Во финална фаза е изградбата на нова спортска сала во ООУ „Блаже Конески“ – објект кој беше повеќегодишна потреба за учениците и наставниците, а сега станува реалност.
За време на владеењето на СДСМ, училиштата добиваа навредливо мали суми, по 10.000 денари за проекти кои што бараа темелна реконструкција.
Денес, благодарение на поддршката од централната власт предводена од ВМРО-ДПМНЕ, на Прилеп му следи нов инвестициски циклус – со конкретни проекти за подобрување на условите во училиштата од кои што можат да се издвојат, Гимназијата „Мирче Ацев“ каде што ќе се вложат 45 милиони денари, во СОУ Ристе Ристески Ричко 17 милиони денари и во ООУ Рампо Левката дополнителни 6,5 милиони денари, сето ова до крајот на оваа година, со што ќе имаме вкупна сума од над 170 милиони денари инвестиции во образованието за 4 години!
Нашата цел е јасна, образование со квалитет, за ученици со иднина.
За разлика од оние кои мислат дека гласови се добиваат со фрази, ние работиме со дела. И ќе продолжиме со уште поголем интензитет, за нашите граѓани и за квалитетно образование на нашите деца.