Стотици факели биле запалени во Солун вчера од страна на членови и приврзаници на грчката националистичка организација „Златна Зора“. Симболичната порака на грчките неонацисти до Македонија е дека ќе горат сите што ќе направат велепредавство и ќе се согласат со употребата на името Македонија во варијантата за финално решение.
Според „Златна Зора“, зборот Македонија не смее да биде дел од името на северниот сосед.
Протестот на партијата која што има 17 пратеници во грчкиот парламент е упатен кон умерената реторика на грчката влада која што по посетата на шефот на македонската дипломатија Никола Димитров најави дека ќе ја поддржи Македонија на патото кон ЕУ и НАТО ако се најде решение за името, позиција која се промени веднаш по заминувањето на Димитров од Атина.
„Златна Зора е подготвена да се бори и против Скопје и против предавниците кои што ќе дозволат кражба на грчко – македонското историско и културно наследство од варварите од Север“, се дел од пораките кои што биле искажани на митингот.
Во неколку наврати предходно членови на оваа партија ги блокираа граничните премини Меџитлија и Богородица во знак на протест на употребата на иммето Македонија од владата во Скопје.
Видеoто од протестот е снимено и објавено од страна на руската агенција „Ruptly“.
Извор: Инфомакс