„Македонија и Македонците во Библијата“ е најновата книга на еминентниот универзитетски професор д-р Ратомир Грозданоски од Православниот богословски факултет „Свети Климент Охридски“ во Скопје.
Станува збор за научно дело од областа на Богословијата, што за прв пат е разработено во Македонија. Самиот наслов на книгата ја открива една од најинтересните теми поврзани со Библијата, Македонија и Македонците.
Професорот Грозданоски, опишувајќи што всушност е книгата, вели дека ова е ЕВАНГЕЛИЕ за секој македонски дом и за нашето поколение.
– За да си ја знаеме библиската вистина за нас. Да го знаеме нашето библиско име и на други да кажуваме. Еве го Божјиот збор за МАКЕДОНИЈА и МАКЕДОНЦИТЕ, запишани во Библијата. Божјо сведоштво! Божја вистина!, вели професорот Грозданоски.
Целиот текст на книгата е напишан на македонски и на англиски јазик, во колор, збогатена со илустрации и е испечатена на најквалитетна хартија.
Рецензенти на ова капитално дело се Академик Ѓорги Поп Атанасов и деканот на Богословскиот факултет, проф. д-р Ѓоко Ѓорѓевски. Изданието на книгата е со благослов на Архиепископот Охридски и Македонски г.г. Стефан.
Книгата ја има во книжарниците на ТРИМАКС, КУЛТУРА и ИКОНА, како и по црквите и манастирите. Ова вредно дело кое треба да се прочита можете да го набавите и преку интернет СО НАРАЧКА преку овој ЛИНК.
Во продолжение прочитајте го Предговорот на книгата од Авторот.
П Р Е Д Г О В О Р
Бог говори за Македонија.
А што кажал Бог за Македонија? Ги спомнува ли Македонците?
Ја пишува ли Македонија во Библијата?
Има ли Македонци во Светото писмо?
Се спомнуваат ли македонски цркви во Библијата?
Дали е сето ова вистина? Така ли пишува и во твојата Библија?
А кој го напишал тоа? Кога и за кого? Чија е таа желба и по чија волја?
Само еднаш ли е тоа запишано некаде во Библијата, случајно, неважно и непотребно, како на грешка?
Не еднаш, туку скоро триесетпати е запишано; не е неважно и непотребно, туку со особено значење и не е отпосле додадено, туку е во библискиот текст од секогаш до денес ‒ го има и во најстарите и во најновите Библии, на најстарите и најсовремените јазици.
Токму тоа ви го нудиме во оваа книга, драги читатели.
Повелете, прочитајте ја и уверете се.
Ви ги посочуваме издвоени библиските текстови и тоа на 7 јазици, а некои од нив ги објаснуваме. Овде се покажува дека Бог говори за Македонија, за Македонците и за македонските цркви.
Тоа го кажуваме јасно и гласно пред сите и за сите. Напишаново го потврдуваме со Божјиот збор. Ви го посочуваме зборот Божји за оваа вистина. А Божјиот збор е запишан во Библијата, за потребите на луѓето. Божји се зборовите, сведоштвата и фактите што ви ги претставуваме во ова издание. Тие се видни и се јасни за сите луѓе во светот и на сите јазици, бидејќи Библијата е најраспространетата книга во човештвото, па секој може напишаново да го прочита, да го провери и да се увери во богоискажаната вистина. Истото го пишува, драги мои, и во вашата Библија на вашиот јазик. Прочитајте го и уверете се. Оваа вистина во Светото писмо ја запишале светиот апостол Павле и светиот апостол Лука, вдахновени и водени од Бога. Ова е Божјо сведоштво, по Божја волја и со Божја промисла ‒ Божја, не човечка.
И најпосле, сигурно е поважно како е запишано во Божјите книги отколку во човечките, како е напишано на небото отколку на земјава, како е пред Бога отколку пред луѓето, таму отколку овде, во вечноста, а не во сегашноста. А библиското е Божјо, а Божјото е вечно.
Повелете, прочитајте и видете коков е Божјиот збор, библискиот текст и библиското време за Македонија и за Македонците. Ви благодарам.
Извор: “Религија.мк”