фотографија – Шлакески Маринко
„БЕГСТВО“ (2011) – Маринко Шлакески драмски текст (извадок)
ПОРУЧНИКОТ: Секогаш сум верувал во големината на нашата армија. Сум гледал на телевизија… знаеш ли дека имаат такви авиони што…
ВОЈНИКОТ: Престани со таа твоја армија и јади, немаме многу време..
ПОРУЧНИКОТ: (во занес) Каква армија… а сепак… не можам да разберам… Уште не можам да разберам што не е во ред.
ВОЈНИКОТ: Нема што не е во ред. Сè е во ред. Зависи од која страна гледаш. За нив е совршено во ред да нè чуваат како животни во кафез и да нè дресираат и жртвуваат по потреба.
(пауза)
ПОРУЧНИКОТ:Сум читал… дека ако одиш надолу низ некаков тунел цело време, можеш да стигнеш на другиот крај на светот, знаеш?
ВОЈНИКОТ: Да, сум читал и јас.
ПОРУЧНИКОТ: Мислиш дека е таму поубаво?
ВОЈНИКОТ: Каде?
ПОРУЧНИКОТ: Таму. На другиот крај.
ВОЈНИКОТ: На другиот крај… Не знам, можеби е убаво, но… Јас сакам да ми биде убаво овде… на овој крај.
ПОРУЧНИКОТ: И јас сакам да ми биде убаво овде, на овој крај. А овде… Овде нè бркаат со хеликоптери, како кучиња…
ВОЈНИКОТ: Да…
ПОРУЧНИКОТ: А се пријавив доброволно за да помогнам… да бидам лојален. Се вложуваш целосно, а тие те оставаат на цедило и кога ќе посакаш да живееш, те бркаат како пес.
ВОЈНИКОТ: И јас се пријавив доброволно… Но… за да ме убијат…
ПОРУЧНИКОТ: Кој да те убие? Зошто?
ВОЈНИКОТ: Така едноставно, да ме убие.. било кој. За да не мора да гледам копилиња и изроди испикани во дупките на нивните пички мајчини! Овде не можеш ни да загинеш како човек. Не ти даваат. Им треба твојата мизерија и ти со неа за да ја одржуваш во живот што повеќе… Но сега веќе не! Сега не им давам да ме убијат. Затоа бегам и затоа сакам да живеам. Ама по мое.
ПОРУЧНИКОТ: По твое.. Како да живееш по твое ако бегаш?
ВОЈНИКОТ: Не знам уште, но ќе пробам. Прво да избегам..
„БЕГСТВО“ (2011) – Маринко Шлакески драмски текст (извадок)