Традиционалната детска манифестација „Снежен град“ годинава ќе се одржи од 18 до 22 февруари на Попова Шапка. 32 ученици од основните училишта од Прилеп, Долнени и Кривогаштани, денеска заминаа за Попова Шапка. Како што соопштија организаторите, Снежниот град ќе го градат деца, ученици од повеќе училишта од Скопје и други градови на Републикава.
Распоредени во екипи од по десетина деца со свој ментор тие ќе го изградат својот град кој што на 22 февруари со свечено отворање во 11,00 часот ќе го предадат на посетителите со што почнува вториот дел на манифестацијата, Снежниот караван кој што ќе се одвива до 28 февруари.
Градоначалникот Марјан Ристески, заедно со градоначалниците на општините Кривогаштани и Долнени, Тони Заткоски и Боше Милошески денеска ги поздравија учениците и им посакаа среќен пат и добар престој.
Во рамките на манифестацијата ќе се одржат и бројни други активности од креативно-рекреативен карактер, како избор на Снежна убавица, спортски игри, пинг понг, билијард, рачен фудбал и пикадо, Снежен крос, Најслатка бонбона, Снежно бинго, Бал под маски и диско-забава за учесниците на Снежниот град.
