Во преостанатите часови од 2018 година се потсетуваме на сите личности од Прилеп чии стории, достигнувања и дела ја одбележаа оваа година. Тие се нашите херои, а нивната приказна, спортски подвизи, случки од минатото и дела… ја oсвоија нашата публика. Ова се ликовите кои заслужуваат уште многу да се зборува за нив, нивните животни стории да бидат пример, а нивните успеси и подвизи да бидат мотив.
Прилепчаните Илија Димоски, Дејан Дамески, Горан Гулески и Филип Илиоски, направија несекојдневен подвиг, поминувајќи 645 километри за 42 часа со велосипеди.
Нивната тура започнала утрото во 4 часот од Прилеп на 20 јули, а потоа се упатиле кој Дојран и граничниот премин Дојрани.
До 16:00 часот веќе биле во Солун и поминале вкупно 220 километри, што е навистина импресивна бројка да се извози во неполн ден.
Веќе наредниот ден со нови сили патот го продолжиле кон Калитеа до каде поминале дополнителни 80 километри.
Откако добро се одмориле и уживале 3 дена во топлото сонце и плажа, во вторникот околу 20:00 часот се упатиле кон Воден до каде успешно совладале нови 153 километри. Таму пристигнале во 5 часот утрото, а веќе во 17:00 часот тргнале кон Прилеп.
До Прилеп им следувале уште 160 километри, а во родниот град пристигнале ноќта околу 3:00 часот.
Задоволни од нивната незаборавна авантура, веќе прават планови за следна.
Црногорското приморје и Будва се следни на “менито” за авантуристите од Прилеп.
