Заврши уште еден успешен турнир во мал фудбал “Св. Никола” во Прилеп.
Големото финале кое вечерва се одигра пред преполна сала, донесе извонредна фудбалска претстава, а на крајот на шампионскиот трофеј и наградата од 260.000 денари се радуваше екипата на Теа Андреа-Хајф Кафе, кои после пенал рулетот ја совладаа екипата на АСП ПАК со 3:2, откако во регуларниот дел резултатот беше 2:2.
Претходно во натпреварот за третото место Компанија Атанасовски славеше со 6:0 против Best Solar/Tag Balkan, a помеѓу малото и големото финале се одигра и ревијален натпревар помеѓу ветераните на Победа и Пелистер, кој црвено-белите го добија со 2:1.
На крајот може да се додаде дека турнирот го красеше одлична организација, а фудбалските вљубеници се надеваат дека наредното издание одново ќе го дочекаат во Универзалната сала.
