Месечината во петок ќе стане „крваво црвена”, поради што теоретичари на заговор веруваат дека на нашата планета конечно (по којзнае кој пат) и дошол крајот.
Прилично активниот „Јутјуб проповедник“ Пол Бигли вели дека „темно-црвената сенка на Месецот е можеби знак за второто доаѓање”.
-Знаете, Бог ми се обрати неодамна и ми рече дека морам да посветам внимание на „крвавиот Месец“. Ми кажа и дека треба да откријам што всушност се случува и јас открив дека тоа ќе биде најдолигата крвав Месечина во последните 100 години. Јас осознав и дека тоа ќе се случува над Ерусалим, што е неверојатно, истакнува „пророкот“.
Тој потоа се повикува и на Библијата, потсетувајќи дека и древниот израелски пророк Јоил запишал дека „Сонцето ќе се затемни, а Месечината ќе се претвори во крв пред големиот ден кога Господ ќе дојде”.
Ова, сепак, не е првпат крвавиот Месец да се поврзува со „Судниот ден” и пропаста на светот. За среќа, овие векови наназад, при тој вселенски феномен околу нашиот природен сателит, никогаш не дошло до промени од библиски размери.
Затоа, познавачите препорачуваат- не ги откажувајте плановите за викендот.
Поцрвенувањето на Месечината утре својата кулминација ќе ја достигне во 20:22 часот по Гринич, односно 22:22 часот по македонско време.