Да се остави бакшиш (или не) на келнерите во кафулињата и рестораните ширум светот е прашање што им пречи на многу патници бидејќи обичаите за бакшиш не се исти во сите земји. Во Велика Британија, Германија, Данска и Шведска, по правило, гостите во кафулињата и рестораните додаваат 10 отсто од сумата на сметката, додека Французите, Италијанците и Шпанците обично оставаат бакшиш во износ од 5 отсто од сметката, пишува Punkufer.
И додека Американците бакшиш оставаат дури и ако услугата не била добра, во Јапонија такво нешто никогаш не се случува.
Во земјата на изгрејсонцето, правилата на однесување се различни. На пример, никогаш нема да видите Јапонец како јаде додека оди, го дува носот на јавно место, а повеќето граѓани на оваа земја ја намалуваат јачината на звукот на своите телефони во јавниот превоз. Во Јапонија оставањето бакшиш не само што е необично, туку е и срамно, па дури и грубо.
Културата на давање услуга без бакшиш можеби ни е незамислива, но во далечната источна земја е сосема спротивно. Ако му дадете бакшиш на келнерот, тој ќе се навреди. „И покрај предупредувањето за бакшиш во Јапонија, некои туристи инсистираат да ја покажат својата благодарност со пари – но тоа не функционира така во оваа земја“, открива Џејмс Мунди од InsideJapan Tours за Би-Би-Си. Тој додава дека не е необична глетка да се види келнер како трча по гостин за да ги врати парите што ги оставил за бакшиш. Едноставно на туристите не им е паметно дека Јапонците си ја вршат работата со гордост и дека е доволно да се каже oishikata (вкусно беше) или gokizo sama (благодарам што го подготвивте јадењето) и малку да се поклонат, ако сакате да се заблагодарите за добра услуга.