Меган и јас се упатуваме кон непознато, но навистина немавме друг избор, рече принцот Хари на првото појавување во јавноста, откако го објавија заминувањето од службените должности во британското кралско семејство.
-Сакам да појаснам дека Меган и јас не одиме никаде- рече принцот во говорот вчера вечерта во Лондон на добротворна вечера организирана од Сентебале, организација за помош на деца заболени од СИДА во Јужна Африка, чиј основач е Хари.
-Велика Британија е мојот дом и местото што го сакам и тоа нема да се промени- додаде тој.
Двојката на Твитер минатиот месец соопшти дека ќе се повлече од позицијата „високи членови на Кралското семејство“ и ќе се обидат да станат финансиски независни.
-Можам да замислам што слушавте и читавте во изминатите недели. Затоа, сакам да ја слушнете вистината од мене, колку што можам да споделам со вас – не како принц или војвода, туку како Хари- рече Хари.
Јас секогаш ќе имам најдлабока почит кон баба ми, мојот главен командант, истакна тој.
-Се надевавме дека сè уште ќе можеме да им служиме на кралицата, комонвелтот и моите воени здруженија, но без јавни пари. Тоа, за жал е невозможно. Се согласив со тоа, знаејќи дека тоа нема да влијае ниту врз мене како личност, ниту врз мојата лојалност- рече Хари.
Кога Меган и јас се венчавме, “бевме возбудени, надежни и подготвени да служиме. Затоа, јас сум многу тажен што вака заврши. Мојата одлука да се повлечеме со мојата сопруга не беше лесна, додаде тој.
-На ова му претходеа повеќемесечни разговори и години на предизвик и знам дека не секогаш правев сè како што треба, но во овој поглед, навистина немаше друг избор- заклучи принцот.
Текстот на говорот е објавен на Твитер профилот на парот, пренесува Би-Би-Си.