Најмасовен граѓански марш “За заедничка Македонија” во Прилеп.
Под паролата “За заедничка Македонија” и декорот на црвено-жолтата боја на македонското сонце, прилепчани вечерва најмасовно до сега откако се одвиваат мирните протести, излегоа на градските улици и го кренаа гласот, го кренаа гласот за татковината, за зачувување на мајчиниот јазик, за зачувување на унитарноста на државата.
Грмеше градот херој од јуначките чекори на илјадници прилепчани. Се чувствуваше бунтот во нивните лица и треперот во нивните срца.
Желбата на прилепчани за зачувување на државата огромна, а тоа го докажуваат со секоја вечер се помасовните маршови.
Протестот во Прилеп вечерва го предводеа стотина земјоделци со нивната механизација и на овој начин го изразија својот револт кон СДСМ за спреченоста да им бидат исплатени заслужените субвенции.
Од споменикот на “Прилепските бранители” до комплексот “Карпалак” се тресеше земјата, ечеше од грлата на илјадници патриоти и вљубени во татковината граѓани.
Интонирањето на државната химна, дополнително ги стопли срцата, а пред прилепчани со моќен говор се обрати и универзитетската професорка по историја Виолета Ачкоска.
Пред илјадниците граѓани се обрати и Данчо Милески, претстедател на Сојузот на тутунските здруженија на Македонија, кој ја пренесе поддршката од земјоделците тутунари за “Заедничка Македонија”.
Протестите во Прилеп продолжуваат и утре, на истата локација, во 18 часот, пред хотел “Липа”.
A.Г.