Група млади ентузијасти и вљубеници во природата од Прилеп, од неодамна го оформија новиот планинарски клуб “Мамути”.
Клубот е формиран поради големата заинтересираност, особено на младите планинари и љубители на планинарството, но и се поголемиот интерес од повозрасната популација.
До сега клубот организираше голем број на тури, на кои присуствувале голем број на љубители од сите генерации, не само од градов туку и пошироко, од Битола, Охрид, Неготино, Велес, Штип…
Планинарските тури најчесто се одржуваат во државата, но се планираат и тури надвор од границите на Македонија.
До сега искачени се тури на највисокиот врв на Балканот – Мусала (2925м.н.в.) во Бугарија и искачување на врвот Кајмакчалан (2521м.н.в.), од грчка страна, со посета на Лутраки и Воден.
Оваа година планирани се голем број на тури, од кои надвор од државата е искачување на Олимп со врвот Митикас (2917 м.н.в.) и искачување на врвовите Вихрен (2912м.н.в.) и Тодорка (2746 м.н.в.) на планината Пирин во Бугарија.
Планинарскиот клуб “Maмути” исто така, наредниот месец (23.04), во чест на човекот кој го градеше домот на Селечка Планина – чичко Томе Темелкоски, организира 20 километарска планинарска тура.
Стартот на турата е закажан во 08:00 ч. од манастирот Св.Димитриј – с.Селце, каде е и крајната точка.