Соопштение од фудбалскиот клуб Победа:
-Почитувани љубители на фудбалот, новото раководство на ФК Победа АД Прилеп изразува почит и се заблагодарува до сите навивачи што беа дел од минатиот натпревар и учествуваа во хуманитарната акција за помош на семејствата на настраданите жртви од Кочани.
Ве известуваме дека парите се донирани. Воедно ФК Победа АД Прилеп ве кани да бидете дел од следниот важен натпревар, кој ќе се одигра во сабота, 05.04., со почеток од 15:00часот, против Вардар Неготино, и тоа во што поголем број да дадеме поддршка на нашите играчи.
Како што е познато во јавноста ФК Победа во моментов се наоѓа во период на реорганизација, новото раководство донесе едногласна одлука со која клубот се смета за општествено одговорна организација и сите љубители на фудбалот кои се дел од ранливите категории на граѓани (социјални случаи, граѓани со физички хендикеп…) можат да ги подигнат своите сезонски билети во просториите на клубот.
Влезот за деца до 14 години исто така ќе биде бесплатен. Како дел од новите промени во клубот, ве известуваме дека ФК Победа има слободни позиции за тренери во академијата, сите заинтересирани кандидати може да ги достават своите резимеа на официјалниот е-маил на клубот, или во клубските простории.
Кандидатите треба да се на возраст до 35 години, да зборуваат англиски јазик и да имаат основно познавање за работа со компјутери, како и да поседуваат Б лиценца.
Клубот исто така информира дека влезници за натпреварот помеѓу Победа и Вардар Неготино можат да се набават и денеска, од штандот на плоштадот “Методија Андонов-Ченто”, лоциран кај Тргачо.