Семејството Кондоски од Прилеп имаат развиено еден доста уникатен занает со кој се гордеат. Нивна преокупација е изработка на икони. Го посетивме нивниот дуќан и разговаравме за тоа како започнале, кои им се приоритетите, плановите и за тоа дали добро се живее од овој занает.
Не пречекаја расположени и насмеани и ни излегоја во пресрет. Со работа започнал Сашо Кондоски или главата на семејството, кој со многу труд, ентузијазам и енергија го постигнал она што денес е окупација на целото семејство.
Во нивното опкружување имаат 8 вработени кои вредно си ја вршат работата и се надополнуваат на идеите на Сашо.
Инаку Кондоски веќе 22 години активно се занимаваат со изработка на икони, а убавината на нивните ремек дела можат да се погледнат преку фотографиите.
Огромна мајсторија и љубов е вложена при изработката на истите.
Нивниот дуќан изобилува со најразлични икони, различни големини и различни материјали на изработка.
Иконите ги изработуваат од дрво, медиапан, платно, специјална фолија и 18 каратна позлата.
Работат во големи количини и се доста задоволни како од постигнатото така и од продажбата на истите.
Велат дека Прилепчани се големи верници и редовно купуваат, кој за свој дом, кој за поклон.
Во работата се вклучени како што споменавме Сашо , неговата сопруга Оливера, како и синот Дејан. Заедно сложни, спремни да постигнат многу и да пренесат љубов и светлина во многу домови преку своите изработки.
