Oд 27-ми јуни до денеска 3-ти јули, градската депонија кај Алинци во близина на Прилеп гори и претставува нова еколошка бомба во срцето на Пелагонија. Шест дена депонијата во Прилеп гори, а полето е исполнето со чад и канцерогени состојки, кои се голема закана за здравјето на граѓаните, особено на земјоделците кои работат по нивите, но и вработените во странските фабрики во индустриската зона Алинци – истакна на денешната прес конференција Ирена Стерјовска Локвенец, претседател на Унијата на жени при ОК ВМРО-ДПМНЕ Прилеп.
Прес конференцијата во продолжение ја пренесуваме во целост:
“Дали за оваа еколошка катастрофа некој ќе одговара и што ли работат од ЈКП Комуналец под чија надлежност е депонијата?
Загрижен ли е заменик министерот за животна средина Макрадули, бидејќи најплодната рамница во Македонија доживува труење од невиден размер?
Дали за оваа штета што се предизвикува ќе постои одговорност од градоначалникот Илија Јованоски и директорката на Комуналец Ирена Станковска, или како за се друго луѓето од власта на СДСМ ќе останат недопирливи?
Вака ли изгледа новиот концепт на старо-новиот претседател на ОО СДСМ Миле Талески и вака ли ќе работи во интерес на граѓаните?
Во период кога граѓаните се соочуваат со екстремни горештини, само поради неспособноста на власта мораат да дишат и отровен воздух.
За тоа колку е сериозен проблемот, зборува и оваа фотографија на која се гледа голем облак од чад над градот, иако надлежните велат дека огнот е ставен под контрола.
Почитувани,
После скандалот во кој граѓани информираа дека тињата и талогот од пречистителната станица се закопува во земјоделско земјиште, ова е втор случај на загадување на животната средина, пред кој локалната власт молчи.
Толку од ветувањата на градоначалникот за еколошки и чист град. Умира и последната надеж дека овие луѓе нешто ќе направат за Прилеп и прилепчани.
Поради нивната неспособност да раководат со општината и јавните претпријатија, станаа синоним за неспособност како локално раководство во Република Македонија, или како што тие ја нарекуваат “Северна”.
