Стопанственикот Зоран Јанески е кандидат за градоначалник на политичката партија Левица за Крушево. Добро познат помеѓу крушевчани, Јанески во своето обраќање до нив бара поддршка за општината да се врати на обичните луѓе, на работниците.
-После долго размислување одлучив да го прифатам предизвикот за кандидат за градоначалник од политичката партија ЛЕВИЦА.
И покрај притисоците да се откажам, јас сум човек кој не се откажува и не потклекнува без разлика дали е добар или лош период.
Затоа драги сограѓани ве повикувам да размислите и сами да одлучите на кој сакате да ја дадете вашата доверба за претстојните четири години. Вие одлучете дали ќе биде како до сега. Дали ќе дозволите општината да биде заробена од двете најголеми партии кои се виновни за уништувањето на Крушево. Или пак ќе се охрабриме и за прв пат од осамостојувањето на Република Македонија ќе му дадете шанса на работник.
Да ја вратиме општина Крушево на обичните граѓани, на работниците. Бидете здрави и живи и вие донесете ја одлуката – стои во обраќањето до крушевчани и жителите на околните населени места на Јанески.
