Во ликовната галерија од ЦК „Марко Цепенков“ во Прилеп беше отворена изложбата ДОДЕКОМАНИЈА од уметникот Ацо Таневски. Градоначалникот Марјан Ристески беше дел од овој настан поздравувајќи го и посакувајќи му на уметникот многу успеси и понатаму.
Додекоманија креира концептуализиран и промислен интермедијален творечки проект, спој на ликовниот и поетскиот израз, блиска средба помеѓу сликата и песната, спој на два уметнички јазик контекстуалности/текстуалности, знаковности и семантички пракси. Додекоманија обединува на едно место четириесетина песни и исто толку визуелни претстави – колажи. Во друг контекст ликовниот елемент би бил илустрација на поетскиот запис, но овде овие два медиуми се перцепираат секој одделно, то ест се надополнуваат, затоа што претставуваат заокружени и лично одбележани целини, но воедно би можеле и да се читаат и како деликатни, симболични и културолошки кодирани паралелности. Можеби и самата поезија инспирирана од секојдневието на авторот, во својот зародиш го содржи ликовниот елемент, кој Таневски го претвора во слика.
БИОГРАФИЈА од Таневски
Ацо Таневски роден 1965 година во Скопје. Средно уметничко училиште и Факултет за ликовни уметности завршил 1991 во Скопје, педагошки отсек со сликарство. Член на ДЛУМ од 1993 година, и активен член на Сојузот на ликовни педагози. Има 10- годишно искуство од областа на образованието. Во моментов вработен како едукатор во Национална галерија на Македонија. Организатор на едукативни работилници и изложби за млади. Освен со ликовна, се занимава и со театарска и книжевна уметност.
Учесник на преку 60- ина групни изложби во земјата и во странство, како и на 30 ликовни колонии.
Селектирани самостојни изложби:
2017- WAS IST DADA галерија КО- РА, Скопје, Македонија
2016 – Марини – центар за култура Мирка Гинова, Д. Капија,МК
2015 – R4 , галерија КО-РА дом на култура Кочо Рацин, Скопје,МК
2015 – Додекоманија, Њујорк, САД
2013 – 4 од 16, Заечар, Србија
2012 – Приказни од детството, Софија, Бугарија
2011 – Приказни од детската соба, Скопје, Македонија
1992 – Отпечатоци, Базел, Швајцарија