Голем број прилепчани присуствуваа на вечерната богослужба во манастирот Св. Петка кај Лениште, во чест на паднатите бранители на Карпалак (Фото галерија)

Со положување цвеќе пред спомен обележјето во касарната “Мирче Ацев” и со вечерна богослужба во манастирот Св. Петка кај село Лениште, започна одбележувањето на 24-годишнината од загигувањето на 10-те прилепски бранители кај Карпалак.

На 8 август 2001 година 10 резервисти беа убиени, а тројца ранети кога конвој од хермелин, два автобуса, камион и комбе од Прилепската касарна одел кон Тетово. Кај месноста Карпалак конвојот бил начекан во терористичка заседа во 9:30 часот и врз него бил отворен жесток оган од тешки митралези и рачни ракетни фрлачи. Едно транспортно возило било погодено со ракетен фрлач, при што загинале осум војници и двајца офицери, сите од резервниот состав. Со ракетен фрлач бил погоден и еден од автобусите. Борбите за извлекување на преживеаните 108 луѓе траеле повеќе часови.

Грозоморниот чин од пред 24 години и денеска предизвикува измешани чувства – гнев, тага, но и надеж дека кога и да е правдата ќе биде задоволена, а виновниците ќе одговараат за своите постапки.

Прилеп секоја години достоинствено им оддава почит на паднатите бранители, а така е и оваа година. Синоќа голем број прилепчани присуствуваа на вечерната богослужба во манастирот Св. Петка кај Лениште – кој е еден од симболите каде се негува споменот на загинатите од Карпалак.

Таму присутен беше и актуелниот заменик министер за економија и труд, Марјан Ристески, кој е еден од преживеаните бранители од црниот 8. август 2001 година.

Нека овој настан остане како вечно сеќавање на згаснатите животи и никогаш повеќе да не се повтори!




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.