Светите браќа Кирил и Методиј ја напишале бугарската азбука, барем според бугарскиот Парламент. По ветото кое и го испорачаа на Македонија, Бугарија со уште една провокација. Изгласан предлогот за преименување на празникот кој досега се славеше на 24 мај, како Ден на бугарското образование, култура и словенско писмо, во Ден на светите браќа Кирил и Методиј, за бугарската азбука, образование и култура, и за словенската литература.
Ова доаѓа само два дена откако Бугарија ја блокираше Македонија. А токму еден од условите на источниот сосед е македонскиот јазик, за кој тврдат дека има корени од бугарскиот. Чекор подалеку оди Каракачанов, преку соопштение на неговата ВМРО- БНД, вели дека македонскиот јазик, бил бугарски дијалект.
ВМРО-БНД е партијата која го понесе овој предлог за преименување на празникот до Собранието, каде настана и дискусија по ова прашање.
„Колку што разбирам, во бугарската научна јавност може да има различни спорови и за ова прашање, но неспорен е фактот дека бугарскиот придонес кон кирилицата е систематски и грубо напаѓан од Русија и од Македонија и треба да си го кажеме тоа, затоа посочете кој работи против бугарскиот национален идентитет во оваа насока“, изјави Тома Биков од владејачкиот ГЕРБ на премиерот Бојко Борисов како одговор на критиките од опозициската БСП.
„Откажете се, зошто тоа е длабоко внатрешно противречно и дава можности за различни интерпретации, од кои ќе трпат бугарските културни институти, вклучувајќи ја и нашата комисија што работи со Република Северна Македонија“, укажа претходно собранискиот потпретседател Валери Жабљанов од БСП.
На крајот, предлогот од ВМРО на вицепремиерот и министер за одбрана Красимир Каракачанов поднесен уште летоска доби 86 гласа „за“, 43 пратеници беа против, а 4 воздржани.
Со тоа, државниот празник 24 Мај се преименува од „Ден на бугарската просвета и култура и на словенската писменост“ во „Ден на светите браќа Кирил и Методиј, на бугарската азбука, просвета и култура и на словенската книжевност“.
