Еуфорично беше викендов во белгискиот град Гент. Борците на Дарко Чатлески го вжештија борилиштето и гордо го виореа македонското знаме.
На 03.12.2016 во градот Гент во Белгија се одржа кик-бокс гала под наслов “НОЌ НА НОВИТЕ ТАЛЕНТИ”. Учество зедоа повеќе клубови од Белгија, а од Македонија учествуваше кик-бокс клубот “Шампион” од Прилеп, под водство на тренерот Дарко Чатлески. Од “Шампион” учествуваа тројца борци против борци од Белгија.
Резултати:
- -56 kg.Trajce Ilioski (Tem Chatleski) vs. Ilyase Jmida (Team Trooi) 1:2
- -42kg. Martin Aleksoski (Team Chatleski) vs. Kayra (Team Mac) 1:2
- -61 kg. Bojan Stanojoski (Team Chatleski ) vs. Zabiullah Azimi (Team Bushidos) 3:0
Прв настапи Трајче Илиоски. Борбата беше жестока, од првата рунда до крајот на борбата непрекинато се разменуваа удари со раце и нозе. Одлуката беше тешка за судиите каде што на крајот го прогласија белгискиот борец за победник со резултат 2:1.
Втор настапи Мартин Алексоски. Нашиот борец од првата до третата рунда беше надмоќен над белгискиот борец со комбинација на рачна и ножна техника. На крајот одлуката на судиите 2:1 за белгискиот борец ги изненади сите присутни во салата и со исвиркивање го покажаа револтот за неправедната одлука на судиите.
Трет настапи Бојан Станојоски. Три рунди тактички и технички и со чисти и прецизни удари водеше нашиот борец. После добро завршената работа во рингот со резултат 3:0, победата беше доделена на нашиот Бојан Станојоски.
“Презадовплен сум од настапот на нашите борци. Со макотрпна работа и тешки тренинзи докажавме дека можеме да се носиме со европските борци и со успех да ја претставуваме нашата Република Македонија. На секое влегување и излегување од рингот со нашите борци бевме поздравувани од водителот на настанот со зборовите “Поздрав За Македонските Борци”. Тоа е голема работа за нас и мене како тренер и претставник на тимот. Со овој настан завршуваме за оваа година во кик-боксот и ќе договарам борби за наредната 2017 година. Сега сме фокусирани на државното првенство во бокс што ќе се одржи во Битола на 09-10.12.2016 година. Ќе настапиме со три боксери”, изјави тренерот Дарко Чатлески.
