По повод Светскиот ден на ретки болести (28 февруари), претставници од Здружението на граѓани со ретката болест – цистична фиброза беа во посета на кабинетот на градоначалникот Илија Јованоски.
Ивана Атанасоска од Асоцијацијата за цистична фиброза на средбата посочи дека оваа болест е избришана од Регистарот на ретки болести во Македонија, а во Европа постојат во Регистарот на ретки болести.
Терапијата и сите трошоци за храна и суплементи според претставниците на оваа Асоцијација се многу скапи, при што месечните трошоци за нега се движат помеѓу 200 и 300 евра.
Покрај Ивана, со последиците на оваа болест во нашиот град се соочува уште едно младо момче, и две други дечиња.
Градоначалникот вети едно вработување и друга поддршка не потенцирајќи каква за овие лица, кои се соочуваат со огромни проблеми во секојдневието.
Бидејќи јавноста остана незапознаена со каква поддршка ќе излезе во пресрет градоначалникот, еве еден предлог.
На овие лица и нивната Асоцијација одлично би им дошла помош од 32.000 евра, кои би се обезбедиле од продажбата на супер луксузниот автомобил Шкода, кој пред Нова година го набави директорот на Инспекторатот за земјоделие во Прилеп, Јане Станкоски, инаку кадар на СДСМ.
Доколку Јованоски ги извести во Владата и во Министерството за земјоделство неговите сопартијци за ваквиот потег на директорот и побара итна продажба на овој автомобил, за чија набавка извести порталот “Курир” неодамна, тогаш ќе се видат и чесните намери на градоначалникот да ги поддржи овие лица.
Доколку Владата реши да го продаде и овој автомобил како и владиниот Мерцедес, тогаш овие 32.000 ќе значат по 8.000 евра за секое од овие четири млади лица, што со сигурност за подолг период ќе го олесни третирањето на болеста.