Синоќа по 22-ри пат основното музичко училиште „Ордан Михајлоски – Оцка“ од Прилеп го одржа својот традиционален новогодишен концерт, во театарот „Војдан Чернодрински“, на кој учениците се претставија со повеќе дела.
„Секоја година ООУМ „Ордан Михајлоски – Оцка“ одржува предновогодишен концерт, за да се прикажат достигнувањата и успесите на нашите ученици. Една од целите на концертот е музиката да не е исклучиво сериозна, ќе имаме и презентација на популарна музика за да се создаде една убава предновогодишна атмосфера. Исто така имаме и божикни песни, за да биде атрактивен целиот настан за публиката“, вели директорката Ролина Тутеска Димеска.
Таа додава дека во последно време заинтересираноста на младите за посета на музичкото училиште е голема. Моментално училиштето го посетуваат 363 ученици.
„За поголема промоција на училиштето во иднина, планирам организација на што е можно повеќе семинари, да се шири училиштето во смисла на тоа да се организираат ревијални вечери, разни настапи, концерти и да се има поголема соработка со другите градови. Она што ни недостасува во овој момент е помала сала за интерни часови и помали концерти. Години наназад го доставуваме тоа како барање, но не се реализираше. Училиштето сега е целосно реконструирано, но на Прилеп му недостасува една концертна сала и таа треба да се изгради во најскоро време“, порача директорката Тутеска Димеска.
Учениците музицираа на клавир, виолина, флејта, труба, кларинет, хармоника, народни инструменти и соло пеење.
„Јас учам виолина веќе 8 години. Виолината мислам дека го дава најубавиот звук, токму затоа и ја одбрав како инструмент. Вечерва ќе се претставам со делото ‘Мал виенски марш’ од Крајслер. Имам учествувано на многу државни и меѓународни натпревари. Сум добивал многу први, втори и трети награди. Мојата идна цел е да настапувам во странските земји како врвен виолинист“, вели ученикот Леонардо Димоски.
„Јас веќе 4-та година сум во музичкото училиште во Прилеп. Свирам саксафон, затоа што уште како мал го гледав мојот татко како свири на саксафон и затоа и јас се одлучив за овој инструмент. Настапувам на полно концерти, сега бев и на еден меѓународен натпревар каде освоив прва награда во камерна музика, а оваа година добив исто така и награда на еден државен натпревар. Идна цел во животот ми е ако веќе продолжам да свирам на овој инструмент и професионално да се занимавам со тоа“, рече ученикот Мирослав Миленкоски.
