Да се забавува голема публика и да се погоди сечиј вкус, особено да сте “виновникот” за добра забава и прекрасен помин, не е воопшто лесна работа. Хари Ристески или Диџеј Харис е млад музичар и продуцент, а пред се вљубеник во музиката. Желбата да застане зад диџеј кабината ја добива уште на мали нозе, од тогаш посветено чекори кон она што се нарекува движење во ритам, посветувајќи ја целата своја енергија во продуцирање на енергични звуци, кои ќе допрат до секое уво. Нам ни е чест што за гостин го имаме еден од најперспективните диџеи во државата, кој се грижи за добрата забава низ цела Македонија.
Kако се роди љубовта кон музиката и што беше пресудно да застанеш во диџеј кабината и да ги забавуваш луѓето?
Пред се, фала за поканата за интервјуто. Па, љубовта кон музиката ми е од мали нозе, имам завршено основно музичко училиште тука во Прилеп. Пред да застанам зад диџеј кабината, редовно ги посетував нашите локали, се поврзав на некој начин со тогашните диџеи, ме привлече енергијата што се пружи на таквите журки и добрите вибрации, и решив и јас да ја превземам таа одговорност.
Лесно ли е да се биде диџеј, да се забавува публиката и да си погоди вкусот и расположението на присутните гости во локалите?
Искрено, не се станува диџеј преку ноќ. Треба вежбање, едукација во музиката и кон правецот што си го одбрал да го сервираш на публиката.
Каде најчесто настапуваш?
Настапувам низ цела Македонија, во кафиќи, ноќни клубови, фестивали итн.
Каква музика негува Диџеј Харис и што се може да се слушни на твоите сетови за време на настапите?
На моето мени се најдува пред се Хаус музиката, ЕДМ, Трап и Хип Хоп. По настапите се обидувам на секого да му пружам позитивна и голема енергија.
Имаш ли некој свој сопствен производ до сега изработено?
Заедно со диџејството исто така и продуцирам. До сега имам извадено над 20 песни и ремикси под мое име од типот Прогресив и Електро Хаус и Трап жанр.
Дали соработуваш со некоја дискографска куќа?
Па до сега 90% од песните што ги имам направено се издадени за различни издавачки куќи надвор од нашава земја, како на пример – Paranoja Records (Austria), Kallexas Records (Serbia), Tropical Madness Records (Argentina), Vandetta Records (Serbia), The Lucky Network / Trap 13 Records (France) итн.
Што според тебе недостига на македонската диџеј сцена? Имаме ли добри млади диџеи кои можат да растураат во иднина на големи настани?
На македонската сцена имаме многу млади диџеи што се навистина талентирани и веќе имаат безброј искуства. Не фали ништо, само да продолжи желбата и упорноста кон оваа професија.
Дали соработуваш со некој од познатите диџеј имиња?
Моментално не соработувам, но имам навистина за мене одлична поддршка од големите имиња како што се – Dada Life, Ookay, Aerochord, Ftampa, LOUDPVCK, Slander, Felguk, Henry Himself итн.
Каде се гледа Диџеј Харис во иднина, која е твојата цел која сакаш да ја постигнеш преку музиката?
Кај се гледам.. хмм… Па се гледам искрено на големите фестивали и клубови. А целта од време на време се менува кога ќе ја постигнам.
Од твоите искуства и настапи надвор од Прилеп, што му недостига на градот под Марковите Кули, каков вид на забава?
Забавите си се на место, само народот треба повеќе да ја цени електронската музика. Она што ќе го доживееш од балканската музика и од електронската е сосема различно.
За крај твој совет кон сите оние кои сакаат професионално да се занимаваат со овој тип на работа
Само упорност и желба за работа, да бидат позитивни, да го живеат својот сон, и да не се замараат ако некој ги критикува, тоа да им биде мотивација плус за постигнување на тоа што го замислиле.