Швајцарија, Бугарија, Белгија се следните земји каде што Елена Велевска ќе одржи концерти. Таа во моментов работи на новата песна, а веднаш по снимањето започнува со настапите низ нашата земја, но и низ Европа.
Откако перидов убаво се одмори во друштво на своето семејство, Велевска започна со подготовка на нов материјал. Веднаш после снимањето на новата песна, започнуваат нејзините ангажмани и настапи ширум Македонија, а за краток период ќе следуваат и концерти во Бугарија, Швајцарија и Белгија.
“За претстојниот период, само да ми заврши снимањето во студио со новата песна, веднаш почнуваат моите ангажмани во Македонија, Бугарија, а веднаш после тоа на 3-ти март имам гостување, односно концерт во Швајцарија, додека на 14-ти април гостин сум во Белгија и се надевам дека и таму ќе имаме убаво организирани македонски концерти, кои што ќе поминат со големи прослави, бидејќи Mакедонците ги има насекаде низ светот”, истакна Велевска при неодамнешното гостување на “ИН ТВ”.
“Кај и да сме, ние си ги сакаме нашите песни, тука сме да им ги пренесеме на оние кои не се во Македонија, а сакаат да ги слушнат македонските рефрени, па затоа тоа го правам со задоволство. На 9-ти февруари заедно со Менил Велиоски имаме една српска забава, во дискотека “The One” во Софија и тоа се засега моите однапред закажани ангажмани. Секогаш гледам да не бидат премногу во мојата агенда, а да бидат доволно квалитетни за да го зачувам она ниво за коешто се борев низ години да го достигнам”, додава Елена.
Со оглед на тоа што Елена е доста зафатена со настапи во текот на целата година, периодот околу Новогодишните празници одлучи овој пат да го помине со нејзиното семејство, што одамна не и се случило.
