Ракометарите на РК Прилеп во рамки 10. коло од Супер лигата го пречекаа шампионскиот тим на Еурофарм Пелистер. Прилепчани кои имаа водство во неколку наврати на стартот од натпреварот, при 6-5 водство ги налутија гостите од Битола кои потоа до врв ја наполнија нивната мрежа.
Крајниот резултат на семафорот беше 25-40. Битолчани иако не пристигнаа со најсилиот состав, а во нивните редови од поискусните беше само голманот Хеидарирад, немаа поголеми проблеми и погодуваа од секоја ситуација. Ги немаше Хаџиќ, Митревски, Брестовац…, а поголема минутажа добија Мирче Кајлџиоски и Самоил Ристевски.
Кај гостите Петар Атанасијевиќ даде 7 гола, а еден помалку Мирче Кајлаџиоски. Во тимот на Прилеп најдобар поединец беше Ангел Крстески, кој постигна 7 гола.
По 10 одиграни кола Прилеп е во долниот дел на табелата со 6 освоени бода, а во наредното коло избраниците на Таневски ќе се соочат со Радовиш на гостински терен.