Илјадници прилепчани и вечерва го кренаа гласот и ја осудија платформата од Тирана со која се руши унитарноста на државата. Прилепчани не се согласуваат со промена на знамето, химната, грбот на државата и воведување на албанскиот јазик како втор службен јазик во државата.
Дваесет дена татни и грми под Маркови Кули од гласот на граѓаните кои си ја сакаат државата и кои се спремни да направат се’ за да ја зачуваат.
Дваесет дена црвено-жолтата боја е симбол на Прилеп, а граѓаните порачуваат дека нема да се откажат и ако треба цела година ќе излегуваат на улиците и ќе маршираат против разнебитувањето на својата татковина.
Со прилепчани вечерва беа и браќата Турци, предводени од Шенол Мемиш претседател на македонското-турско здружение “Мустафа Кемал – Ататурк” од Битола, кој упати пораки за обединување на сите заедници во државата и порача дека сето она што се бара во платформата од Тирана е деградирање на другите државотворни етнички заедници во државата.
Граѓанската иницијатива “За заедничка Македонија” за утре ги организира најмасовните граѓански маршови во целата држава, а најголема поддршка одново се очекува од Прилеп. Граѓанските здруженија ги повикаа сите прилепчани утре да излезат низ градските улици и да им порачаат на Еврокомесарот Јоханес Хан и европратениците, дека народот нема да дозволи формирање на влада која ќе работи на реализирање на платформа од туѓа држава.
Пред прилепчани се обрати и Снежана Бунтеска, раководител на одделението за народна одбрана и професорката Снежана Трајкоска, кои исто така упатија силни пораки до илјадниците граѓани.
