По децении недоверба, па дури и отворена омраза, иницијативата Отворен Балкан ноци нови ветрови на Балканот – соседите почнуваат да се запознаваат, да соработуваат и да се гледаат како пријатели. За нецели четири години (првиот состанок на иницијативата беше во септември, 2019 година во Нови Сад) Отворен Балкан доживува досега невиден позитивен одговор од македонските граѓани без оглед на кој дел од етничкиот спектар припаѓаат.
Така, на прашaњето како ја оценувате идејата за Отворен Балкан меѓу Северна Македонија, Србија и Албанија – позитивно одговориле 63,3 проценти од граѓаните. А, она што е уште поинтересно е дека поддршката за ОБ е речиси подеднаква и кај Македонците и кај Албанците од Македонија и изнесува 62 и 67 проценти.
Се чини дека младите меѓу 18 и 29 години се навистина нашата иднина. Кај нив поддршката за Отворен Балкан е на огромни 70,9%, повеќе од две третини. Младите, ослободени од националистичките наративи на минатото, сегашноста не ја гледаат во изолационизмот и затворените граници, туку во нивното отворање и овозможувањето на соработка и заеднички напредок на регионот – нешто што иницијативата Отворен Балкан го нуди во изобилство.
Во очекување на понатамошното отстранување на преостанатите бариери меѓу државите на Отворен Балкан, како и најавеното пристапување на Црна Гора, младите можат да си дозволат реалистичен оптимизам дека работите на Балканот конечно се одвиваат во добра насока.
Доаѓа нова ера на отворени општества на Балканот и повеќе од очигледно, граѓаните нетрпеливо го очекуваат тоа.