Во петокот на 15.04.2016 година, во ООУ “Кирил и Методиј” во населеното место Канатларци, се одржаа две активности во склоп на проектот за Меѓуетничка интеграција во образованието.
На деветто одделенците од Канатларци на гости им дојдоја врсниците од истоименото училиште од Кочани, кои следат настава на македонски јазик. Децата се дружеја без разлика на различната етничка вероисповед и различниот јазик кој го говорат. Заедно со наставниците од нивните училишта на интересен начин истражуваа за македонските и турските обичаи за свадба, за верските објекти, за карактеристиките и начинот на приготвување на традиционални јадења, како и за познатите македонски и турски автори.
Втората активност од овој проект се реализираше на спортскиот терен со ученици од трето и четврто одделение, кои исто така во мешан состав другаруваа меѓу себе и се забавуваа низ спортско рекреативни игри со инструкторите од Open Fun Football Schools Macedonia. Спортот е одлична можност за запознавање на двата етникуми и за градење на идни пријателства.
