Малкумина говорат позитивно кога ќе се спомене некоја текстилна конфекција. Реткост е вработените да се пофалат со убави услови за работа, одличен однос од менаџментот и сопствениците на ваквите производствени капацитети. Но кога се говори за компанијата Комфи Ангел од Прилеп, сите вакви негативни коментари паѓаат во вода. Оваа компанија којa успешно работи и продуцира во нашиот град, вработува повеќе од 1000 луѓе и се грижи за нивните потреби, нивното задоволство, ги цени и наградува сите залагања на своите вработени. Компанијата претставува странски капитал и своето производство во најголем процент го извезува на странски пазари. Она што ја прави лидер во својата работа е огромната посветеност, одличните човечки ресурси, како и вредна и мотивирана работничка рака.
Карактеристично за оваа компанија е општествено одговорната свест, па така во текот на своето работење, компанијата Комфи Ангел има реализирано многу соработки со невладиниот сектор, многу хуманитарни акции, меморандуми за соработка, реализирани проекти за кревање на претприемачкиот дух кај младите во средните училишта и факултетите и.т.н.
Тоа сето говори за отвореноста и достапноста на оваа компанија, како и подготвеноста да се помогне секоја манифестација, настан, да се подигне некоја свест, да се истакнат човековите вредности, да се докажи дека компаниите и фирмите не се тука само и само да остварат приходи, туку дека тие се главните двигатели на општеството, и дека компаниите треба да им возвратат на оние кои работат во нив и за нив.
Еден таков настан компанијата Комфи Ангел организираше во месец ноември 2015 година, кога дел од своите производи, перници и постелнини, на градскиот плоштад Методија Андонов Ченто во Прилеп, ги пласираше по пониски цени, а собраните парични средства ги намени за Здружението на граѓани за лица со епилепсија и родители на деца со епилепсија во РМ, – ЕПИЛЕПСИЈА МАКЕДОНИЈА.
Оваа акција беше прифатена со огромно задоволство од сите граѓани и предизвика огромна масовност.
Генерелниот менаџер Ирена Јакимовска, е главниот столб и двигател на компанијата кон успехот што го остварува. Нејзините постојани ангажмани, работни средби, предавања, ја прават личност од која треба да учат најдобрите студенти и сите оние кај кои постои претприемачки дух и смисла за бизнис треба да ги следат нејзините чекори.
Дека сето погоре кажано е вистина говори и фактот што Комфи Ангел измината година беше наградена и со две престижни награди во Лондон од Асоцијацијата „RSM international at European Business Awards“. Прво место освои за национален шампион за увоз-извоз и второ место за увоз-извоз на европско ниво, во конкуренција на десет компании.
Грижата кон вработените ја докажуваат со организирани Тим Билдинг викенди, трибини во соработка со реномирани професори, што ретко која компанија го прави. На ваков начин се издигнува секако мотивацијата, се намалува работниот стрес, се вложува во своите вработени и се зголемува нивната продуктивност при работа.
Во 2013 година, вработените од Комфи Ангел ја направија најголемата перница во светот, и ја внесоја компанијата и Прилеп по втор пат во Гинисовата книга на рекорди.
Ова е мал дел од една успешна сторија која постои 11 години, постојано чекори кон напредок, постојано насочена кон освојување на нови пазари, на зголемување на производствени капацитети, мал дел од успешната сторија Комфи Ангел.
Посакуваме само едно, ваквите трендови на комуникација, соработка, отвореност и посветеност да се пресликаат и на другите компании, особено на оние кои работат во текстилната гранка на индустријата.