На синоќешниот избор на најдобрите спортисти за 2019 година, манифестација која ja организираше Општина Прилеп, каратистката Пулексенија Јованоска беше избрана за најдобра меѓу најдобрите.
Освоеното петто место на Европското првенство за сениори во кати, беше доволно, покрај титулата спортистка на државно ниво, Пулексенија да биде избрана и за најдобар спортист на општина Прилеп за 2019 година.
Дарко Чатлески од боксерскиот клуб „Ас“ е најдобриот спортски работник за 2019 година.
Одличните резултати на државните првенства во бокс во категориите: деца, кадети, јуниори и сениори, освоеното второ место во боксерската младинска и сениорска лига, како и боксерскиот спектакл “Profi Boxing Night Prilep”, кој минатото лето се одржа на градскиот базен “Маркови Kули”, се повеќе од доволни адути за ова спортско одликување за Дарко Чатлески.
Исто така минатаа година во Шибеник, Р. Хрватска, се одржа Генералното Собрание на најголемата и најреномирана организација во Европа за професионален бокс, Европската Боксерка Унија (Е.Б.У), а Чатлески беше делегат кој ја претставуваше Македонија.
Меѓу десетте најдобри спортисти на градот, од второто до десеттото место се најдоа параглајдеристот Борјан Јованоски, пингпонгарот Ѓоко Јочкоски, џудистот Давор Велкоски, Катерина Милеска од женскиот фудбалски клуб „Деспина“, џудистката Теодора Димеска, Мери Чкрипеска од Ориентациониот клуб „Златоврв“, натпреварувачката во параглајдинг Александра Уфцеска, Стефанија Перканоска од спортско качувачкиот клуб „Златоврв“ и гимнастичарката Теа Велкоска.
На синоќешниот избор, за најдобар клуб за 2019 година беше прогласен парглајдинг клубот „Делта“, најдобар тренер е Дејан Мицкоски од џудо клубот „Сеишин“, најдобра младинска екипа е ФК „Победа“, а најдобар тренер во работа со младите категории, Адријано Котевски од ракометниот клуб „Прилеп“.
Фудбалерот на италијанскиот „Удинезе“ и на македонската фудбалска репрезентација, Илија Нестороски е најдобриот играч кој настапува за странски клуб, најдобар спортист со инвалидност е пингпонгарот Рубинчо Ристески, а плакета за најдобар судија за 2019 година и’ беше врачена на Валентина Пурдеска.
Дипломи за постигнатите резултати во 2019 година добија десетмина млади спортисти: фудбалерот Лука Георгиески, велосипедистот Андреј Маџоски, Елеонора Кржеска од Ориентациониот клуб „Златоврв“, натпреварувачката во борење Барбара Стојкоска, џудистот Владимир Милчиноски, фудбалерката Сара Ефтинџиоска, фудбалерот Давид Јошески, каратистот Матеј Белистојаноски, гимнастичарката Сара Петрова и ракометарот Бојан Вренцоски.
Покрај градоначалникот Илија Јованоски и претседателот на општинскиот Совет Миле Талевски, наградите на најдобрите спортисти им ги врачија поранешниот фудбалер на „Победа“ и спортист на Прилеп за 1976 година, Рубин Ѓорѓиески,
Гордана Цветаноска, поранешна ракометарка на „Тутунски Комбинат“ и македонска репрезентативка, екс-репрезентативецот на македонската ракометна репрезентација Гоце Макалоски, претседателот на Џудо федерацијата Владимир Трпаноски и селекторот на македонската параглајдинг репрезентација, Миле Јованоски.