Претседателот на Европската комисија Жан Клод Јункер, жестоко ја критикувал британската премиерка Тереза Меј на вториот ден од самитот на ЕУ во Брисел.
Тие двајцата биле снимени во жестока расправија, а Јункер наводно и рекол дека целосно е “небулозно” она што Велика Британија го бара од ЕУ.
“Сакаме да знаеме што бараат нашите британски пријатели од нас. Се наоѓаме во дебата која е понекогаш небулозна и непрецизна”, рекол Јункер.
Таа изјава на Јункер ја изнервирала британската премиерка која не разбрала добро што рекол тој.
“Како ме нарековте? Me нарековте небулозна”, рекла Меј разлутена.
Иако на видеото објавено на Твитер не се слушаат нивните зборови, експертите успеале да ги пренесат преку читање на усни.
NEW – Two expert lipreaders tell 5 News that Theresa May accuses Jean-Claude Juncker of describing her as nebulous.
This is how the conversation went, according to the lipreaders: pic.twitter.com/IuP99fJiXG
— Channel 5 News (@5_News) December 14, 2018
Јункер и рекол дека не мислел така, а таа инсистирала: “Да, рековте!”. Потоа продолжиле да се расправаат, а Јункер се обидел да ја смири.
Тереза Меј подоцна на новинарите им рекла дека имале остра расправа, но рекла дека она што имала да го каже било “кристално јасно”. Таа додала дека Јункер го искористил изразот “небулозно” мислејќи на дебатата за Брегзитот, а не за нејзе лично, нешто што подоцна и објаснил.
Меј во Брисел се обидува од лидерите на ЕУ да добие дополнителни уверувања за својот договор за Брегзит да може да го протурка во британскиот парламент.
