MАКЕДОНИЈА фуриозна и против Црна Гора: Црвено-жолтите се во следната фаза и први на табелата

Македонија го нанижа и вториот триумф на Европското првенство во Хрватска, откако во вториот натпревар ја победи Црна Гора 28:29 (16:15 на полувремето).

Со овој триумф нашите репрезентативци се искачија на првото место во групата Ц, откако Германија ремизираше со Словенија.

После млитавото прво полувреме во кое примивме 16 голови, во вториот дел повторно нова Македонија на теренот. Советите на Гонзалез на полувремето повторно вродија со плод, а внесувањето на Филип Кузманоски во игра се чини беше главното оружје во нападот.

Младиот џин натпреварот го заврши со 5 погодоци. Одличен беше и Mиркуловски кој иако играше со повреда постигна 4 погодоци, а исто колку имаше и Манасков.

Капитенот Лазаров натпреварот го заврши со 4 погодоци, а солидни меѓу стативите беа и двајцата голмани Митрески и Ристовски.

Кај Црногорците најефикасни Грбовиќ, Чавор и Вујовиќ.

Со оваа победа нашите репрезентативци се пласираа во вториот круг од првенството, а колку бодови ќе пренесат во наредната фаза ќе се знае после натпреварот со Германија во среда, кој Македонија го игра од терминот 18:15 часот.




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.