Две лица на возраст од 23 и од 24 години од Скопје се уапсени поради инволвираност во подготвување извршување кривично дело „тероризам“ и за поврзаност со повратници од ИСИС, информира денеска директорот на Бирото за јавна безбедност Митко Чавков.
– Министерството за внатрешни работи како дел од поширока регионална оперативна акција во борбата против тероризмот на 4 овој месец по претходно издадени наредби извршени два претреси од кои едниот во Скопје, а другиот во село Арачиново. За време на извршените претреси пронајдено е и обезбедено 24-годишното лице од село Арачиново, додека второто лице е приведено на Косово – рече Чавков на прес-конференција во МВР.
Посочи дека за лицето е поднесена кривична пријава поради постоење основи на сомнение за сторено кривично дело „тероризам“ по член 394-б од Кривичен законик на Република Македонија при што од страна на судија за претходна постапка му е изречена мерка притвор во траење од 30 дена.
– При претресите се пронајдени и со потврда одземени мобилни телефонски апарати со СИМ-картички, фотоапарати со микрокартички, метален боксирач, регистарски ознаки, куршум, компјутерски куќишта, таблет, УСБ и разна документација – рече Чавков.
Чавков, одговарајќи на новинарско прашање, рече дека станува збор за лица за кои постоеле разузнавачки информации од претходно дека се припадници на исламски радикализам, како и дека имаат поврзаност со повратници од ИСИС, односно странски борци.
– Нивните цели беа преземање конкретни терористички акти на територијата на Македонија. Намерите и интенциите на оваа структура се осуетени со навремено добивање разузнавачки информации – рече директорот на Бирото за јавна безбедност Митко Чавков.
