Во рамките на одбележувањето на Европскиот ден на јазиците – 26 септември, под мотото “Креирање ѕид на јазиците“, денес учениците од ООУ “Гоце Делчев“- Прилеп под менторство на наставниците по македонски јазик и странски јазици: англиски, француски и германски јазик, организираа креативна работилница за промовирање на јазичната разноликост.
Во работилницата беа вклучени ученици од одделенска и предметната настава, кои креираа знамиња на земјите од Европа, како и пораки со поздрави на повеќе европски јазици меѓу кои и македонскиот јазик, истакнувајќи ја различноста на јазиците, како и важноста на учење и познавање на други јазици и култури, со кои може да се воспостават нови мостови на меѓусебна соработка и почитување.
Низ цела Европа, 800 милиони Европејци застапени во 47 земји-членки на Советот на Европа се охрабрени да учат повеќе јазици, убедени дека јазичната разноликост е алатка за постигнување на поголемо меѓукултурно разбирање и клучен елемент во богатото културно наследство на нашиот континент.
На иницијатива на Советот на Европа, Стразбур, Европскиот ден на јазиците се прославува секоја година од 2001 година на 26 септември.
