Сите нови засилувања на црвено-белите – Победа купи цела постава во зимскиот трансфер период

Прилепскиот фудбалски миленик, зимскиот трансфер период го искористи за засилување на сите позиции на теренот, па ангажираше дури 11 нови играчи.

Во Прилеп пристигнаа: Алтин Лога, Иван Ивановиќ, Дарко Тофилоски, Благојче Спиркоски, Никола Јаќимовиќ, Зоран Даноски, Валентин Колевски, Лукас Силва Сантос Жуниор, Александар Исаевски, Виктор Велкоски и Андреј Петкоски.

28-годишниот играч за врска Алтин Лога доаѓа од второлигашот Струга Трим Љум, настапувал и за Велазерими и Гостивар.

27-годишниот црногорски интернационалец Иван Ивановиќ се очекува да ја засили конкуренцијата и да го подигне квалитетот на напаѓачкиот дел од тимот на Шефот на Стручнот штаб Славољуб Бубања. Станува збор за искусен фудбалер кој во својата кариера настапувал за повеќе црногорски клубови: Челик Никшиќ, Младост Подгорица, Рудар Пљевља,Морнар Бар а како интернационалец и за тимот на Атурај од Казахстан.Прогласен е за најдобар играч на Црна Гора во сезоната 2013/2014 кога го бележи и својот прв репрезентативен настап во мечот против Луксембург.

Мрежата на Победа во пролетниот дел од сезоната ќе ја брани искусниот и добро познат на македонската фудбалска јавност Дарко Тофилоски, кој се врати во Прилеп.

Тој по освојувањето на двете шампионски титули со Победа во сезоните 2003/2004 и 2006/2007 изгради успешна интернационална кариера настапувајќи за: Шафхаузен, Кошице, Ружомберок, Дунајска Среда и Алашкерт.

Благојче Спиркоски кариерата ја започна во 11 Октомври, потоа настапуваше за Турново, а во Победа доаѓа од второлигашот Еуромилк, каде беше стандарден првотимец. Со неговиот ангажман клубот ја продолжува стратегијата за враќање во градот на сите талентирани фудбалери кои ќе го носат дресот на прилепската гордост ФК Победа.

27-годишниот српски стопер Никола Јаќимовиќ беше петтото засилување на Победа во тековниот зимски преоден рок. Станува збор за искусен дефанзивец со чиј ангажман се очекува да се зацврсти последната линија на тимот која се покажа како многу проблематична во тест натпреварите. Јаќимовиќ, доаѓа од прволигашот Будуќност Добановци за кој на 15 натпревари има постигнато два гола. Претходно настапувал и за Шумадија, Бежанија и Баск.

Крилниот напаѓач Зоран Даноски по 6 години минати во Чешка се враќа во Макеоднија и во пролетната полусезона ќе настапува за прилепска Победа.

Со ангажманот на 27-годишниот Даноски тренерот на Победа Бубања добива квалитетен офанзивец и силен адут во напаѓачката формација на црвено-белите од која напролет се очекува далеку поголема ефикасност за разлика од есенската полусезона.

Даноски во есенската полусезона настапуваше за Прибрам во чешката Втора лига, каде на 15 натпревари постигна 4 гола. Во кариерата настапувал за Кожуф, од каде прави трансфер во чешки Мост, па во Прибрам, а како позајмен од овој чешки клуб настапуваше за скопски Металург, Тиквеш Кавадарци и хрватски Интер Запрешиќ.

Левот централен дефанзивец Валентин Колевски по една година се враќа во ФК Победа. 27 годишниот Колевски, кој во есенскиот дел на тековната сезона настапуваше за ФК Новаци, се враќа во клубот каде бележеше забележителни настапи и се очекува да ја засили последната одбранбена формација пред голот на Тофилоски.

Во сезоната 2015-2016, кога Победа ја освои шампионската титула во Втората лига, имаше најголема минутажа, а претходната 2016-2017, кога црвено-белте дебитираа во Првата лига, настапи на 13 натпревари. Во досегашната кариера Колевски ги бранел боите уште на: 11 Октомври, Локомотива и Напредок.

Победа го обезбеди и потписот и на младиот 22-годишен офанзивец Лукас Силва Сантос Жуниор (роден 19.02.1996 год).

Лукас беше желба на Победа на стартот на преодниот рок, за трансферот да се реализира пред истекот на периодот за трансфери. Откако се покажа во добро светло, одработи подготовски со српскиот прволигаш Раднички Ниш во Анталија каде и одигра неколку натпревари, но не пронајде заеднички јазик околу условите, се реши да ја прифати понудата на Победа.

Се очекува со неговиот ангажман Победа да добие на инвентивност и квалитет плус во офанизивниот дел, оној препознатллив бразилски шмек на кој прилепчани 90-тите години ги навикнаа покојниот Оливеира и Жилсон. Силва, кој е полушпиц, настапувал за Арсенал МГ и Униао Лусензе.

Комплетното пополнување на играчкиот ростер бешее при крај со ангажманот на 23-годишниот левоног страничен фудбалер Александар Исаевски. Тој долго време живеел и кариера изградил во САД настапувајќи за колеџ екипи со забележителен успех – во две сезони околку 40 натпревари и 9 голови. Во Победа доаѓа по есенските 14 натпревари за Македонија ЃП, а особено по поволниот впечаток на пробниот меч со Дрита во Охрид.

Со младиот стоперски тандем Велкоски-Петкоски Победа го заокружи спписокот на засилувања

Прилепскиот прволигаш Победа на ден пред завршувањето на зимскиот преоден рок го официјализира ангажманот на двајца млади централни дефанзивци.

22-годишниот Виктор Велкоски во Победа доjде од прволигашот Скопје, каде беше стандарден првотимец во есенската полусезона, каде пропушти само два натпревари.

Велкоски е продукт на школата на Вардар, каде ги минал сите категории, а настапувал уште за Пелистер во Првата и Љубанци во Втората лига.

19,5 годишниот Андреј Петкоски по неколку години се враќа во родниот Прилеп. По настапите за 11 Октомври и Кожув, тој запишувајќи се во фудбалската академија во Скопје неколку години настапуваше и беше меѓу најзабележителните во школата на ФК Работнички.

Минатата пролет настапуваше за тогашниот прволигаш Хоризонт Турново, а есенската полусезона за второлигашот Победа Валандово.

Утре со почеток од 14 часот на стадионот во Турново, Победа го стартува вториот дел од сезоната со пелагониското дерби против Пелистер.