ВМРО-ДПМНЕ ОК Прилеп: Парична помош од 12.000 денари за семејствата кои имаат принова

0

За ВМРО ДПМНЕ граѓаните се секогаш на прво место. Затоа предвидовме во нашата програма реализација на уште многу нови проекти кои ќе го направат поквалитетен и подостоинствен животот на сите наши сограѓани, рече носителот на советничката листа од оваа партија на денешната прес-конференција Петар Ристески.

-На семејствата кои имаат принова и живеат на територијата на општина Прилеп ќе им доделиме парична помош од 12.000 денари а за дечињата од претшколска возраст ќе изградиме 3 нови детски градинки и ќе го решиме проблемот од недостаток на сместувачки капацитети за нашите најмили. На секој првоодделенец во општината ќе му обезбедиме ранец и ученички прибор, а учениците во основните и средните училишта ќе добијат бесплатни училишни униформи.Сите училишта на територијата на општината ќе добијат енергетски ефикасни фасади, нова опрема и партерно уредување и на учениците ќе им обезбедат современи услови за образование. Ќе набавиме нови 10 автобуси и ќе овозможиме нови линии во јавниот градски сообраќаен превоз а за пензионерите ќе овозможиме бесплатен превоз секоја среда, сабота и недела, истакнаа од партијата.

Од ВМРО-ДПМНЕ ОК Прилеп велат дека посебно внимание во нивната работа ќе посветат и на заштитата на економски и социјално ранливите семејства и на граѓани со инвалидитет и попреченост.

-За инвалидизираните лица ќе обезбедиме набавка на по 5 електрични колички годишно, ќе отвориме центар за поддршка на млади лица со хендикеп и посебни потреби каде лицата ќе имаат можност да стекнат одредени работни и професионални вештини со кои ќе бидат конкурентни на пазарот на труд, ќе продолжиме да организираме крводарителски акции и хуманитарни турнири и ќе отвориме Дневен центар за возрасни лица со тешка и најтешка попреченост. Ќе ја продолжиме практиката за склучување на договори за вршење јавни работи со лица кои се од социјално ранлива категорија а договорите ќе бидат склучувани за период од најмалку девет месеци, а програмата ќе се реализира континуирано секоја  година. Заедно, продолжуваме да се бориме за подобар живот за секој граѓанин во општина Прилеп! Ве повикуваме, заедно и после 15 октомври да продолжиме да се бориме за економски развиена, модерна општина!  За Прилеп, потенцираа од ОК на ВМРО-ДПМНЕ во Прилеп.